ఆస్ట్రేలియా స్టార్ క్రికెటర్ స్టీవ్ స్మిత్.. తన రిటైర్మెంట్ తీసుకునేలోపు చేయాల్సిన రెండు అతిపెద్ద విషయాల గురించి చెప్పాడు. వీటిలో ఇంగ్లాండ్ గడ్డపై యాషెస్ గెలవడం, భారత్లో టీమ్ఇండియాను ఓడించడం ఉన్నాయని అన్నాడు.
"నేను ఎక్కాల్సిన రెండు అతిపెద్ద పర్వతాలు ఉన్నాయి. వాటిని అధిరోహిస్తే అంతకు మించిన ఆనందం మరొకటి లేదు. నేను ఆ రెండింటిని అందుకుంటానని అనుకున్నాను. చూద్దాం ఏమవుతుందో. ఇంకెంత కాలం ఆడతానో తెలియదు. కానీ అంతలో వాటిని సాధించేందుకు కృషి చేస్తాను" -స్టీవ్ స్మిత్, ఆసీస్ ప్రముఖ క్రికెటర్
ఆస్ట్రేలియా క్రికెటర్ స్టీవ్ స్మిత్
గతేడాది ఇంగ్లాండ్లో జరిగిన యాషెస్ 2-2తో డ్రా ముగిసింది. ఫలితంగా ఆస్ట్రేలియా ట్రోఫీని నిలబెట్టుకుంది. ఈ సిరీస్లో 774 పరుగులతో స్మిత్ అద్భుత ప్రదర్శన కనబర్చాడు.
2017 భారత పర్యటనలోనూ నాలుగు టెస్టుల్లో మూడు సెంచరీలు చేసి ఆకట్టుకున్నాడు స్మిత్. కానీ ఆ సిరీస్ను 1-2 తేడాతో కోల్పోయింది ఆసీస్. మళ్లీ 2022 అక్టోబరులో మనదేశానికి రానుంది కంగారూ జట్టు.
